رودي نبيل تكتب: اهم شهرين في حياتك… الفرصه اللي هتحدد مستقبلك لسه في ايدك
مع اعلان جدول الثانويه العامه بدأ العد التنازلي فعلا، وبقى قدامك فرصه حقيقيه ترتب كل حاجة من جديد.
الفترة الجاية مش بس مهمة… دي اللي هتفرق بين اللي حلم وحقق، واللي كان ممكن يوصل وما وصلش.
سيب اللي فات تماما وابدأ صفحة جديده، لان التفكير في اللي ضاع هيضيع عليك اللي جاي، وركز بكل طاقتك في المرحله الحالية.
كل مجهودك موجه
خلي كل مجهودك موجه للفترة دي بس، لانها فعلا الاهم ومفيش فرصه تانيه بنفس القوة.
الوقت دلوقتي بقى اغلى حاجة عندك، فحاول تستغله صح وما تسيبش يوم يعدي من غير فايدة.
كل دقيقة بتعدي وانت مش بتذاكر هي خسارة ليك، فابدأ من دلوقتي وخلي ليومك قيمة.
التعب اللي هتتعبه اليومين دول هو اللي هيحدد فرحتك بعد الامتحانات، فاستحمل شوية عشان توصل للي نفسك فيه.
افتكر دايما ان اي مجهود تبذله دلوقتي هيرجعلك بنتيجة تستاهل كل التعب.
ما تشكش في نفسك ابدا، انت فعلا تقدر توصل لو اشتغلت صح، لان الوقت لسه كفاية جدا للي عايز يجتهد.
خد بالاسباب وامشي خطوة خطوة، وهتلاقي نفسك بتقرب لهدفك بشكل واضح.
ركز الفترة الجاية على الحل الكتير، لان التدريب هو اللي بيثبت المعلومة ويخليك جاهز لأي سؤال.
اشتغل على النماذج الاسترشادية وعود نفسك على شكل الامتحان عشان تدخل وانت واثق ومطمن.
النجاح الحقيقي في الامتحانات مش بس مذاكرة وتجميع معلومات، النجاح هو قدرتك على اداره ذهنك وأعصابك في الاوقات الحاسمة دي.
افتكر دايما إن المراجعة الذكية أهم بكتير من المذاكره الكتيرة، رتب أولوياتك وابدأ بالمواد اللي شايل همها، وقسم وقتك بين فهم النظري وتطبيق العملي عشان تكسر حاجز الرهبة من الأسئلة الصعبة.
التعب اللي هتحس بيه النهارده هو الضريبة اللي بتدفعها عشان تشتري بيها راحة بالك وفرحة اهلك يوم النتيجة، فاستعن بالله وخليك واثق إن لكل مجتهد نصيب.